ޞަފުޙާއަކީ ކޮބާ؟

"ޞަފުޙާ"އަކީ އަރަމުން އަންނަ ފުރާވަރުގެ ކުދިންގެ އަޑު ގިނަބަޔަކަށް ފޯރުކޮށްދިނުމަށް ގެނެސްދޭ ނޫހެކެވެ. މި ނޫސް ރަސްމީކޮށް ފަށާފައި މިވަނީ 24 ޑިސެމްބަރ 2023 ވާ އާދިއްތަ ދުވަހުގައެވެ. މިނޫސް ((sofha.mv ފަރުމާކޮށްދީފައި ވަނީ JAVAAB ގެ ސީނިއާރ ފުލް ސުޓެކު ޑިވެލޮޕާރ ހުސައިން އަފީފެވެ. އަދި މިނޫހުގެ ޔޫ.އައި ޑިޒައިންކޮށްފައިވަނީ ޔޫ.އައި/ޔޫ.އެކުސް ޑިޒައިނާރ ނޫރު ޔޫސުފެވެ. މިނޫހުގެ އެފް.ބީ ޕޭޖު facebook.com/sofha.mv ހަދަފައި ވަނީ ރ. ހުޅުދުއްފާރު ސުކޫލުގެ ގުރޭޑު 11 ގެ ދަރިވަރު ހަސަން ރަފްހާނެވެ. މި ނޫހުގެ އެޑިޓާރ އެއްގެ ގޮތުގައި މިވަގުތު މަސައްކަތް ކުރާނީ އަޅުގަނޑު އާމްނާ އައްބާހެވެ. މިނޫހުގައި ފުރާވަރު އަދި ޒުވާން 20 ކުދިންގެ ޓީމެއް މަސައްކަތް ކުރުމަށްވަނީ އެކުލަވާލެވިފައެވެ.

ޒަމާނާއެކު ކުރިއަރާ ބަދަލުވަމުންދާ ނޫސްވެރިކަމުގެ މުޅިން އައު ވައްޓާފިޅިއެއް އުފައްދާ ޒުވާން ކުދިންގެ ފިލޯސޮފީއައި، ހިޔާލުތަކާއި، މުޖްތަމައުގައި ހިނގައި ކަންކަމާއި ގުޅޭ ގޮތުން އެކުދިންގެ ހުރި ކަންބޮޑުވުންތައް އާއްމު ރައްޔިތުންނާއި ހަމަޔަށް "ޞަފުޙާ" އިން ގެނެސްދޭނެއެވެ. ސްކޫލު އުމުރުފުރައިގެ ކުދިންނަށް ސްކޫލު ދައުރުގައި އެކުދިންގެ ހުނަރުތައް ތަރައްޤީކޮށް ކުރިއެރުވުމަށް "ޞަފުޙާ" އަކީ ފަހި ފުރުސަތެކެވެ. ތަފާތު ހުނަރުތަކުގެ ކުދިންގެ އަގުވަޒަންކޮށް އެ ކުދިންގެ ހުނަރުތައް މުޖްތަމަޢުއަށް މި ނޫސް މެދުވެރިކޮށް ފެނިގެންދާނެވެ. ލިޔުންތެރިކަމާއި، ފޮޓޯގްރަފީ އަދި ވީޑިއޯގްރަފީއާއި އެޑިޓިންގެ ދާއިރާއިން ކުރިއަށްދާން ބޭނުންވާ ކުދިންނަށް އެ ފުރުސަތު "ޞަފުޙާ" ނޫހުން ތަނަވަސްކޮށްދޭނެއެވެ. މީގެއިތުރުން އެކި ސްކޫލުތަކުގެ ދަރިވަރުންގެ ވާހަކަ ލިޔުމާއި ޅެން ހެދުން ފަދަ އަދަބިއްޔާތުގެ ހުނަރުތައް ސްކޫލުތަކުގެ ހަތަރު ފާރުން ބޭރަށް ނެރެ ގިނަ ބަޔަކަށް ފެންނާނެ މަގެއް ހޯދައިދިނުމަކީ "ޞަފުޙާ" ގެ އެއް ބޭނުމެވެ.

ސްކޫލުތަކުގެ މެދުގަޔާއި އާއްމުކޮށް ހުޅުވާލައިގެން "ޞަފުޙާ" ގެ ފަރާތުން ތަފާތު މުބާރާތްތައް ކުރިއަށް ގެންދާނެއެވެ. މި ނޫސް ކުރިއަށް ދާވަރަކަށް މިފަދަ ފުރުސަތުތައް ހުޅުވާލެވޭނެއެވެ. "ޞަފުޙާ" ވެގެންދާނީ  ފުރާވަރު ކުދިންގެ އަޑު މުޖްތަމަޢުއަށް އިއްވައިދޭ މެދުވެރިޔާއަށެވެ. ފުރާވަރު ކުދިންނާއި ޒުވާނުންގެ ޙިޔާލުތައް މުޅި ރާއްޖެއަށް ހުޅުވައިދޭ ދޮރަކަށެވެ.

އަޅުގަނޑުމެންގެ ހުވަފެނަކީ މިނޫހަކީ ގިނަބައެއްގެ މެދުގައި މަގުބޫލު ގިނަބަޔަކަށް ކަމުދާ ނޫހަކަށް ވެގެން ދިޔުމެވެ. މިކަމުގައި ތިޔަ ބޭފުޅުންގެ އެހީތެރިކަން އަޅުގަނޑުމެން ވަރަށް ބޮޑަށް ބޭނުންވާ ވާހަކަވެސް ދެންނެވީމެވެ. ހުނަރުވެރި ޒުވާނުންތަކެއް "ޞަފުޙާ" ނޫހުގެ ސަބަބުން ބިނާވެގެން ދިއުމަކީ "ޞަފުޙާ" ގެ އުއްމީދެވެ.