ތ. ތިމަރަފުށްޓަށް އުފަން ހަސަން އިޝާން ނުވަތަ މަޝްހޫރުވެފައިވާ ނަމުން ނަމަ "ސީ ފުރޮމް ދަ ސްކައި" އަކީ ރާއްޖޭގެ ވަރަށް މަޤްބޫލު ފޮޓޯގުރަފަރެކެވެ. އިޝާން ގެ ފޮޓޯ ތަކަކީ މިހާރުވެސް ރާއްޖޭގެ ރިސޯޓުތަކުގަޔާއި ބައެއް އެއަރޕޯޓު ތަކުގައިވެސް ބޭނުން ކުރަމުންދާ ފޮޓޯ ތަކެކެވެ.
ފޮޓޯގްރަފީއަށް ޝައުޤުވެރިކަން އުފެދުނީ ކިހިނެއް؟
ފޮޓޯ ނެގުމަކީ އިޝާން އަބަދުވެސް ކުރާ ހިތްވާ ކަމެކެވެ. އެގޮތުން ފޮޓޯ ނެގުމުގެ މި ދާއިރާއިން އިޝާން އާމްދަނީއެއް ހޯދުމުގެ މަސައްކަތް ފެށީ 2017 ހިސާބުގައެވެ. އިޝާން އެންމެ ޝައުޤު ހުންނަނީ ވައިލްޑްލައިފް ފޮޓޯ ނަގުމަށެވެ. އެހެން ނަމަވެސް ރާއްޖޭގެ ފޮޓޯގްރަފީ ދާއިރާގައި ލިބޭ ފުރުސަތުތަކާއި އާމްދަނީއަށް ބަލާ ގިނަ ވަގުތު އިޝާން ހޭދަކުރަނީ ރިސޯޓު ފޮޓޯގުރަފީގައެވެ.
ފޮޓޯގްރަފީ ޕޭޖެއް އަލަށް ފައްޓާ ކުއްޖަކަށް އެންމެ ރަނގަޅީ ކޮން ސޯޝަލް މީޑިއާއެއް؟
އިޝާންގެ އެންމެ ބޮޑު އޯޑިއެންސެއް އޮންނަނީ އިންސްޓަގުރާމް ގައެވެ. މީގެ އިތުރުން ފޭސްބުކާއި އެކްސް (ކުރީގެ ޓުވިޓާ) ގައިވެސް އޯޑިއެންސް ބޮޑެވެ. ނަގާ ފޮޓޯ އަދި ވީޑިއޯތައް ދައްކާލުމަށް އިޝާން ރެކޮމެންޑު ކުރީ އިންސްޓަގުރާމް އަދި ޓިކްޓޮކްއެވެ. އެއީ ގިނަ ބަޔަކަށް ފޮޓޯތައް ދައްކާލެވޭނެ ޕުލެޓްފޯމެއް ކަމަށް އިޝާން ފާހަގަކުރެއެވެ.
އެހާ ބޮޑު އޯޑިއެންސެއް ޖެނެރޭޓް ކުރުމުގެ ސިއްރަކީ ކޮބާ؟
ފޮޓޯ ނެގުމުގެ އިތުރުން އޯޑިއެންސް ބިލްޑް ކުރުމަށް ވެސް އިޝާން ކުޅަދާނައެވެ. އެގޮތުން އިޝާން ގެ އޯޑިއެންސް ބިލްޑު ކުރުމުގެ މައިގަނޑު ސިއްރަކީ "ރިއަލް ކަނެކްޝަންސް" އުފެއްދުމެވެ. އިޝާން ޤަބޫލުކުރާ ގޮތުގައި ސޯޝަލް މީޑިއާއަށް ހަމައެކަނި ފޮޓޯ އަދި ވީޑިއޯ ލުމަކުން ނުފުދެއެވެ. މިކަމުގެ އިތުރަށް ފޮޓޯ ނެގުމުގެ ޝައުޤު ހުންނަ އިތުރު ފަރާތްތަކާއި ވާހަކަ ދައްކާ ގުޅުން ބަދަހި ކުރުމަކީ ވަރަށް މުހިއްމު ކަމެކެވެ. މިކަން ހާސިލް ކުރުމަށްޓަކައި އިޝާންގެ ލަފަޔަކީ ހުނަރުވެރި ފޮޓޯ ގުރަފަރުންނާ މެސެޖުކޮށް ރަހުމަތްތެރިކަމުގެ ގުޅުން ބިނާކުރުމެވެ. އިޝާންގެ ފޮލޮވާރސް ގިނަވުމުގެ ސިއްރަކީވެސް މިކަހަލަ ނެޓުވޯކެއް ބިނާ ކުރުމެވެ.
މިދާއިރާއަށް ވަދެ ކުރިޔަށް ދާން ބޭނުންވާ ކުއްޖަކަށް ދޭން ބޭނުންވާ ނަސޭހަތަކީ ކޮބާ؟
ފޮޓޯގުރަފީގެ ދާއިރާއަކީ މިހާރުވެސް ރާއްޖޭގައި ވަރަށް މަޤުބޫލް ދާއިރާއެކެވެ. ނަމަވެސް މިދާއިރާއިން ކުރިޔަށްދިޔުމުގައި ދިމާވާ ގޮންޖެހުންތަކުން އަރައިގަނެ މިދާއިރާއިން ކުރި އަރާފައިވާ މީހަކަށް ވުމަށް ގިނަފަހަރު ވަނީ އުނދަގޫކަމަކަށެވެ. މިގޮތުން މިދާއިރާއިން ކުރިޔަށްދާން ބޭނުންވާ ކުދިންނަށް އިޝާންގެ ނަސޭހަތަކީ " ފޮޓޯގުރަފީއަކީ ވަރަށް ކެޓަގޮރީސް ގިނަ ދާއިރާއެއް. ރާއްޖޭގައި ފުރުސަތުތައްވެސް ގިނަދާއިރާއެއް. ރިސޯޓް ފުޑް، ވެޑިން، އަރކިޓެކް ޗާރ، މިކަހަލަ ފީލްޑެއްގެ ވިޑިއޯ ޓިއުޓޯ ރިއަލްސްޔޫޓިއުބް ކަހަލަ ތަންތަނުން ބަލާށެ" މީގެ އިތުރުން އިޝާންގެ އިރުޝާދަކީ ފުރަތަމަ ކެމެރާ ނުގަނެ އަމިއްލަ މީހާ ވީޑިއޯ އަދި ފޮޓޯ އެޑިޓިން ގެ ޕުރޮސެސް އަށް ޝައުޤުވެރިކަން އުފެއްދުމަށެވެ. ސަބަބަކީ ފޮޓޯގުރަފީ އަކީ ހަމައެކަނި ފޮޓޯ ނެގުމެއް ނޫނެވެ. ފޮޓޯއެއް ނެގުމަށްފަހު ކުރަންޖެހޭ ކަންކަންވެސް ވަރަށް ގިނައެވެ.
އަލަށް ފޮޓޯގްރަފީ އަދި ވީޑިއޯގްރަފީ ފަށާ ކުއްޖަކަށް އިޝާން ރިކޮމެންޑް ކުރާ ގިއާރސް ތަކަކީ ކޮބާ؟
އަލަށް ފަށާ ކުއްޖަކަށް އިޝާންގެ ލަފަޔަކީ " ވޮޗް އެންޑް ލާން "އެވެ. އަދި ރުފިޔާ އެއްކޮށް ރަނގަޅު ކެމެރާ ބޮޑީއެއް ގަތުމަށް އިޝާން އިރުޝާދުދެއެވެ. ގިނަދުވަހު ގެންގުޅެވޭ، ފޮޓޯ އެޑިޓިން އަދި ވިޑިއޯ އެޑިޓިންގައި ގެންނަން ޖެހޭ ބަދަލުތައް ގެންނަން ރަނގަޅު ކެމެރާ ބޮޑީއެއް އޮތުމުން މި ދާއިރާގައި ކުރިއަށް ދިއުމަށް ފަސޭހަވެގެންދާނެއެވެ.
ނިންމާލަމުން ބުނާނީ ކީކޭ؟
"ކުރާ މަސައްކަތް ޑެލިވާ ކުރުމަކީ ވަރަށް މުހިއްމު ކަމެއް، ޑެލިވާ ނުކުރެވޭހެން ހީވަންޏާހަވާލް ނުވާށޭ"
ޔަޤީނުންވެސް "ސީ ފްރޮމް ދަ ސްކައި" އަކީ ފޮޓޯގްރަފީގެ ދާއިރާއަށް ވަންނަން ބޭނުންވާ ޒުވާނުންނަށް ލިބޭނެ ހިތްވަރެކެވެ. އިޝާނަކީ ޒުވާނުންނަށް ހުރި ރަނގަޅު ނަމޫނާއެކެވެ. އިޝާންގެ ވާހަކަައިން މި ދާއިރާއަށް ޝައުޤުވެރިވާ އެތައް ބަޔަކަށް އުއްމީދުތަކެއް ލިބިގެންދާނެ ކަމާމެދު ޝައްކެއްވެސްނެތެވެ.
